class="post-thumbnail open-lightbox" href>
ကလေးသူငယ်များ၏ ပျော်ရွှင်မှုအား မှန်မှန်ကန်ကန်ထိန်းညှိခြင်း
ကလေးဘဝဟာ လူကြီးတွေထက်စာရင် အပူအပင်ကင်းတယ်လို့ ဆိုပေမယ့် သူတို့စိတ်ဆန္ဒရှိရာကို သူတို့လုပ်ပိုင်ခွင့်မရှိ ၊ သူတို့အတူနေချင်တဲ့သူနဲ့ နေထိုင်ခွင့်မရ ၊ သူတို့သွားချင်ရာ မိမိသဘောဆန္ဒအတိုင်း သွားလာခွင့်မရှိတဲ့ မိမိကိုယ်မိမိမပိုင်သောဘဝမှာ သူတို့ဟာ စိတ်ဖိစီးမှုတွေကို ခံစားနေကြရသူတွေပါ။
ပျော်ရွှင်တဲ့ကလေးအဖြစ် ကြီးပြင်းလာရင် သိပ်ကောင်းတာပေါ့။ အပျော်လွန်တဲ့ကလေးအဖြစ် ကြီးပြင်းလာရင်တော့ ကလေးရဲ့ အနာဂါတ်လူမှုဆက်ဆံရေးအတွက် မကောင်းလှပါဘူး။ ဘဝဟာ အပျော်ကြီးပဲ ခံစားရတာမှမဟုတ်ဘဲလေ။
ကလေးကို အငိုမခံရလောက်အောင် ကလေးလိုချင်သမျှ ၊ လုပ်ချင်သမျှ ဖြည့်ဆည်းပေးနေမယ်ဆိုရင် ကလေးဟာ ကိုယ်လိုချင်တာပဲသိပြီး ဘေးပတ်ဝန်းကျင်အခြေအနေ ခံစားနားလည်မှု မပေးနိုင်တဲ့သူ ၊ သူတပါးကို ခံစားနားလည်မှု မပေးနိုင်တဲ့ အတ္တဘောလေးအဖြစ် ကြီးပြင်းလာတော့မှာပါ။ ဒါဟာ ကလေးကို သူ့ပတ်ဝန်းကျင်မှာရှိတဲ့ လူကြီးမိဘတွေက ဖျက်လိုက်တာပါပဲ။
ကလေးကို အငိုမခံရလောက်အောင် သူ့ဆန္ဒဟူသမျှ ဖြည့်ဆည်းပေးဖို့မဟုတ်သလို ကလေးကို အငိုသည်လေး ဖြစ်ရလောက်အောင်လည်း သူ့ဆန္ဒတွေကို လျစ်လျူမရှုသင့်ပါဘူး။
ဒါဆို ကလေးသူငယ်တွေရဲ့ ပျော်ရွှင်မှုကို ဘယ်လိုထိန်းညှိမလဲ။ အဖြေကလွယ်ပါတယ်။ ကလေးကို တကယ့်ပျော်ရွှင်မှုအစစ်ကို ခံစားစေရမှာဖြစ်ပါတယ်။ ထွေရာလေးပါး အဆန်းတကာ့အဆန်းဆုံး ပစ္စည်းတွေဝယ်ပြီး ဖြည့်ဆည်းပျော်ရွှင်ပေးစေဖို့ထက် သူနဲ့ မိမိရဲ့အချိန်အများစု ကုန်ဆုံးစေပြီး သူ့ကို အဖော်လုပ်ပေးပါ။ ဒီလိုအဖော်လုပ်ပေးရင် ကလေးအတွက် လိုအပ်တဲ့ ပစ္စည်းတွေ ဝယ်ပေးစရာမလိုတော့ဘူးလို့ ဆိုလိုတာမဟုတ်ပါဘူး။ ကလေးဟာ သူ့အရွယ်အလိုက်တော့ သူ့ခံစားမှုတွေကို ခံစားသင့်တာပေါ့။ မဝယ်ပေးနိုင်ရင် သူနဲ့အတူ ဆော့ကစားပေးတာ ၊ ကစားစရာတွေကို အတူဖန်တီးယူတာ ၊ ပုံဆွဲတာ ၊ စက္ကူ ချိုးတာ စသဖြင့်သော ကစားနည်းတွေ အများအပြားရှိပါတယ်။ လိုအပ်ချက်က မိမိသားသမီးရဲ့ ပျော်ရွှင်မှုအစစ်အမှန်ကို သူတို့အနားမှာ အဖော်လုပ်ပြီး ဖန်တီးပေးဖို့ ဖြစ်ပါတယ်။
ကိုယ်လိုချင်တာ အလိုလိုရလိုက်တာဟာ တကယ်တော့ ပျော်ရွှင်မှုအစစ်မဟုတ်ပါဘူး။ ဝမ်းသာမှုလို့တော့ ခေါ်လို့ရတာပေါ့။ ပျော်ရွှင်မှုအစစ်ဆိုတာ ခက်ခက်ခဲခဲ မရနိုင်တာကို အကျိတ်အနယ် ကိုယ့်အားကိုယ်ကိုး ကြိုးစားရင်းနဲ့ ရရှိလာတဲ့အောင်မြင်မှုအတွက် စိတ်ကျေနပ်မှုနဲ့ ပျော်ရွှင်ခြင်းရယ်ပါ။ ဒီလိုပျော်ရွှင်မှုမျိုးရဖို့ဆိုတာ ကြိုးစားအားထုတ်လိုစိတ်ကို အခြေခံထားမှ ရပါတယ်။ ကလေးတွေကို ကြိုးစားအားထုတ်လိုစိတ်ရှိဖို့ လူကြီးမိဘတွေက ကလေးတွေ ကြိုးစားအားထုတ်ချင်စိတ်ရှိအောင် အားပေးတတ်ဖို့လိုပါတယ်။
“ကြိုးစားကွ ၊ ငါ့သား/သမီး လုပ်နိုင်ပါတယ်။ လုပ်ထားကွ ၊ ကျိတ်ထားကွ” စသဖြင့် ကလေးကို သူ့ကြိုးစားမှု အသိအမှတ်ပြုတဲ့ စကားမျိုး ၊ အားပေးမှုမျိုး ပြောပေးမယ့်သူမရှိဘူးဆိုရင် အဲဒီကလေးဟာ ကြိုးစားအားထုတ်လိုစိတ်ရှိဖို့ ခဲယဉ်းနေပါလိမ့်မယ်။ ဒီ့ထက်ဆိုးတာက ကလေးငိုတာနဲ့ “ဘာလိုချင်သလဲ ရော့ … အင့်” အလွယ်တကူ ၊ အသာတကြည် နားအေးပြီးရော ၊ ကလေးစိတ်ချမ်းသာပြီးရော ဖြည့်ဆည်းပေးတတ်တဲ့မိဘတွေဟာ ကလေးရဲ့ ကြိုးစားအားထုတ်လိုစိတ်ကို ဖျက်စီးပစ်လိုက်သူတွေပါ။
ခက်ခဲတဲ့အရာကို မိမိကိုယ်စွမ်းကိုယ်စနဲ့ ကြိုးစားအားထုတ်လို့ ရရှိလာတဲ့ အောင်မြင်မှုကို ကျေနပ်ပီတိဖြစ်မှုကြောင့် ဖြစ်ပေါ်လာတဲ့ခံစားမှုဟာ စစ်မှန်တဲ့ ပျော်ရွှင်မှုဆိုရင် ကလေးကြိုးစားအားထုတ်မှုကို လျစ်လျူရှု မျက်ကွယ်ပြုထားတဲ့မိဘတွေနဲ့ ကလေးအားထုတ်စရာမလိုအောင် အစစ အဆင့်သင့် ဖန်တီးပေးထားတဲ့မိဘတွေရဲ့ သားသမီးတွေဟာ ပျော်ရွှင်မှုအစစ် မခံစားရတဲ့သူတွေဆိုရင် မှားမလားနော်။
ယုံမှားသံသယမရှိပါနဲ့ ။ ဒီလိုမိဘရဲ့ သားသမီးတွေဟာ ကြီးပြင်းလာတဲ့အခါ သဘာဝအတိုင်း လူမှုဝန်းကျင်မှာ စီးမျောရင်း ရရှိလာတဲ့ ရာထူး ၊ စီးပွားဥစ္စာ ၊ ဂုဏ်အင်္ဂါအထွေထွေကို ပိုက်ထားသည့်တိုင်အောင် ပျော်ရွှင်မှုအစစ်ဆိုတာ ဘာလဲလို့ ရှာဖွေဆဲ ၊ ရှာဖွေမြဲ ဖြစ်နေကြမှာပါ။ ဒီလို ရာထူး ၊ စီးပွားဥစ္စာ ၊ ဂုဏ်အင်္ဂါအထွေထွေကို မပိုင်ဆိုင်တဲ့သူတွေကတော့ ပျော်ရွှင်မှုအစစ်ဟာ ဒီရုပ်ထုပစ္စည်းတွေနဲ့ ဂုဏ်ဒြပ်တွေလို့ ထင်ယောင်မှားပြီး ဒါတွေနောက် လိုက်နေဦးမှာပေါ့။
ကလေးတွေ ပျော်ရွှင်မှုအစစ် ခံစားရဖို့ဆိုတာ သူတို့ရဲ့ ကြိုးစားအားထုတ်မှုအပေါ် သူတို့ကိုယ်တိုင် ယုံကြည်တဲ့စိတ် (တနည်းအားဖြင့် မိမိကိုယ်ကိုယုံကြည်မှု) ရှိထားရပါမယ်။ သူ့ရဲ့ ယုံကြည်စိတ်ဟာ သူ့မိဘ ဘယ်သူဘယ်ဝါဆိုတဲ့ ဂုဏ်အပေါ်ကိုသော်လည်းကောင်း ၊ သူ့တွေ့မြင်သိရှိနေတဲ့ မိသားစုပိုင်ဆိုင်မှုကြောင့်သော်လည်းကောင်း ဖြစ်ပေါ်လာတဲ့ ယုံကြည်စိတ်မဖြစ်သင့်ဘဲ (Being himself) လို့ခေါ်တဲ့ သူ့ဘာသာသူ ဖြစ်တည်မှု တနည်းအားဖြင့် မိမိကြိုးစားမှုကြောင့် ရရှိလာတဲ့ အောင်မြင်မှု ၊ စိတ်ကျေနပ်မှု ၊ စိတ်ချမ်းသာမှု ၊ ပျော်ရွှင်မှု စတာတွေအပေါ် မူတည်ပြီး ဖြစ်လာတဲ့ မိမိကိုယ်ကိုယုံကြည်မှု ဖြစ်သင့်ပါတယ်။
ကိုယ့်အားထုတ်မှုအပေါ် မိမိကိုယ်ကို ယုံကြည်စိတ်နဲ့ လုပ်ကိုင်ဆောင်ရွက်တတ်သူ ကလေးတွေဟာ ဘာကြောင့် ပျော်ရွှင်မှုအစစ်ဆိုတာကို ခံစားကြရသလဲ။ သူတို့တွေဟာ လူကြီးမိဘဖိအားကြောင့် ဒီလုပ်ရပ်နဲ့ ဒီပြောဆိုမှုကို လုပ်ကိုင်ရတာမျိုးမဟုတ်ဘူး။ သူတို့ဆန္ဒကို အခြေခံပြီး သူတို့ယုံကြည်ချက်နဲ့ သူတို့ကိုယ်တိုင် အကောင်းဆုံး ကြိုးစားအားထုတ်ထားတဲ့ကိစ္စမို့ ဘေးပယောဂ ကင်းရှင်းစွာ စိတ်ပျော်ရွှင်နိုင်ကြတာပေါ့။
လူကြီးက ဒါလုပ် ၊ ဒါပြောဆိုတဲ့ဖိအားကြောင့် လုပ်ကိုင်ပြောဆိုရလို့ ရလဒ်ကောင်းထွက်လာသည့်တိုင် ကလေးဟာ သူ့ရဲ့ ဆန္ဒနဲ့ ယုံကြည်မှုဆိုတာတွေကို ဟိုးချောင်မှာ လွှင့်ပစ်ထားခဲ့ပြီးမှ လူကြီးခိုင်းတာ မလုပ်ချင် ၊ လုပ်ချင်လုပ်ခဲ့ရတဲ့အတွက် ရလာတဲ့အောင်မြင်မှုဟာ သူ့အောင်မြင်မှုမဟုတ်သလို သူဟာ ပြည့်စုံတဲ့ ပီတိပျော်ရွှင်မှုဆိုတာကို မခံစားရပါဘူး။ သူရရှိတဲ့အောင်မြင်မှုအတွက် သူ့ထက်ပိုပျော်မယ့်သူတွေက သူ့ကို ဖိအားပေးခိုင်းခဲ့တဲ့ မိဘတွေ ဖြစ်နေမှာပါ။
ကလေးသူငယ်တွေ အောင်မြင်မှု သေးသေးဖြစ်ဖြစ် ၊ ကြီးကြီးဖြစ်ဖြစ် ရလာရင် ချီးမြှောက်ဖို့ မမေ့ပါနဲ့ဦး ။ ပစ္စည်းနဲ့ ပေးကမ်းချီးမြှောက်မှ ချီးမြှောက်တယ်လို့ မဆိုအပ်ဘဲ ဖက်လှဲတကင်း ဝမ်းမြောက်ဝမ်းသာ ထွေးဖက်ချီးမြှောက်ခြင်း ၊ စကားအရာဖြင့် ပြောဆိုချီးမြှောက်ခြင်း ၊ ကိုယ်ပေးနိုင်တဲ့ အချိန် ၊ ပစ္စည်းတို့ဖြင့် ပေးကမ်းခြင်းဟာလည်း ချီးမြှောက်ခြင်းပါပဲ။ ကိုယ်ပေးနိုင်တဲ့အချိန် နဲ့ ပစ္စည်းဆိုတာ သူအောင်မြင်မှုရယူလာတဲ့အခါ ပစ္စည်းကောင်းကောင်း မဝယ်ပေးနိုင်သည့်တိုင် ထွေးဖက်ချီးမြှောက်ခြင်း ၊ နမ်းရှုပ်ချီးမြှောက်ခြင်း ၊ စကားအရာဖြင့် ပြောဆိုချီးမြှောက်ခြင်းတွေအပြင် မိသားစုထမင်းဝိုင်းလေးကို ပိုကောင်းတယ်ဆိုတဲ့ ဟင်းလျာလေးတွေနဲ့ သူ့ကို ဂုဏ်ပြုပေးတာမျိုးပါ။ သူကြိုက်တာလေး ချက်ကျွေး ၊ ဝယ်ကျွေးမယ်ဆိုရင် ကလေးဟာ မိဘမေတ္တာနဲ့ စေတနာကို ပိုခံစားရပြီး ဒီဘဝက တိုးတက်သထက်တိုးတက်အောင် ပိုကြိုးစားချင်စိတ် ရှိလာမှာဖြစ်ပါတယ်။
ကိုယ်ပေးနိုင်တဲ့အချိန်နဲ့ ချီးမြှောက်ခြင်းဆိုတဲ့နေရာမှာ အလုပ်က တရက်လောက် ခွင့်ယူလို့ပဲဖြစ်ဖြစ် ကလေးသွားလိုတဲ့နေရာလေးအတူသွား ၊ စားလိုတဲ့အစာလေးလိုက်ကျွေးရင်းနဲ့ သူ့အောင်မြင်မှုကို ချီးမြှောက်ဂုဏ်ပြုပေးခြင်းဖြစ်ပါတယ်။ ဒါ့အပြင် ဒီတရက်ကတော့ မိဘမျက်စိအောက်မှာ သားသမီးစိတ်ကြိုက်ဆော့ကစားခွင့် တနည်းအားဖြင့် သူ့စိတ်ကို တရက်တာ လွတ်လပ်ခွင့်ပေးလိုက်ခြင်းပါ။ သူဟာ ဒီအောင်မြင်မှုရဖို့ သူများထက် ကိုယ်အား ၊ ဥာဏ်အား သုံးပြီး ကြိုးစားအားထုတ်ခဲ့ရတာမို့ အောင်မြင်မှုရလဒ်ထွက်လာတဲ့အချိန်မှာ သူ့ဦးနှောက်ကိုလည်း အနားပေးဖြေဖျော်မှုတွေ လုပ်ပေးသင့်တယ်မဟုတ်လား။ တရက်တာ စိတ်ပျော်ရွှင်မှုဟာ နောင်လာမယ့် အခက်အခဲအသစ်တွေ ၊ စမ်းသပ်မှုတွေကို ဖြေရှင်းဖို့ အားအင်သစ်တွေကို တိုးပွားစေပါတယ်။ အနည်းဆုံးတော့ သူ့စိတ်ညစ်ငြူးမှု ၊ စိတ်တင်းကျပ်မှုတွေကို ဖြေဖျောက်ခွင့်ရသွားတာပေါ့။
အောင်မြင်မှုရယူခဲ့သူကို လက်ကမ်းလို့လည်းမကြို ၊ ရောင့်တက်သွားမှာစိုးပြီး ချီးမွမ်းစကားလည်းမပြောတဲ့အပြင် နောင်ရှုံးရဲရှုံးကြည့် အသေဘဲ ၊ အသိပဲ ဆိုတာမျိုးတွေနဲ့ ခြိမ်းခြောက်လေ့ရှိတတ်သူတွေရဲ့ သားသမီးတွေဟာ ရေရှည်မှာ အောင်မြင်မှုကို ပျော်ရွှင်စွာ ထိန်းသိမ်းထားနိုင်ဖို့ ခဲယဉ်းနေပါတယ်။ အချိန်အတော်ကြာကြာ တင်းပြည့်ကျပ်ပြည့် ခံစားခဲ့ရတဲ့ စိတ်ဖိစီးမှုတွေဟာ တနေ့တော့ ပွင့်ထွက်လာတော့မှာပေါ့။ ဒီလိုပွင့်ထွက်လာတာဟာ အင်နဲ့အားနဲ့ ပေါက်ကွဲထွက်လာတာမို့ ဒီလို စိတ်ခံစားမှုနောက်လိုက်သွားတဲ့ သားသမီးတွေကို မိဘတွေက ထိန်းချုပ်ဖို့ခက်ပါလိမ့်မယ်။
အရင်က ပြောစကားနားထောင်ပြီး သိပ်တော်တဲ့ကလေး အခုမှ ပျက်စီးသွားတယ်လို့ ဆိုတတ်တဲ့မိဘတွေဟာ ကလေးကို တလျောက်လုံး တင်းကြပ်မှုတွေ ပြုလုပ်ခဲ့ပြီး ဖြေလျော့မှုတွေ မပေးခဲ့တဲ့အတွက် ကလေးဟာ လွတ်ထွက်သွားတာလို့ မှတ်ရပါမယ်။ ပြန်ထိန်းသိမ်းနိုင်ပါ့မလားဆိုတဲ့ မေးခွန်းရဲ့အဖြေဟာ ကလေးအပေါ် ကိုယ်ဘယ်လောက် တင်းကျပ်ခဲ့သလဲဆိုတာနဲ့ ကလေးဟာ ဘယ်လောက်အထိ စိတ်ဖိစီးမှုတွေ ခံစားခဲ့ရလို့ စိတ်ဓါတ်ပျက်ပြားသွားသလဲဆိုတဲ့ အဖြေအပေါ် မူတည်နေပါတယ်။ ဒါဟာ ကလေးဆိုးတယ်ဆိုတာထက် မိဘက ကလေးဆိုးသွားအောင် ဖိအားပေးခဲ့တာပါ။
ကလေးသဘာဝက မိဘဟာ သူတို့ကို ဖေးမဖို့အသင့်ရှိတယ်။ နားလည်မှုရှိတယ်။ တတ်အားသမျှ ဖြည့်ဆည်းပေးတယ်။ သူ့ဘက်ကိုယ့်ဘက် မျှတတတ်ပြီး အရေးကြုံရင် အကာအကွယ်ပေးဖို့ အဆင်သင့်ရှိတယ်ဆိုတဲ့ ခံစားမှုနဲ့တင် ပျော်ရွှင်တဲ့ကလေးတစ်ယောက် ဖြစ်နေပါပြီ။ ကလေးကိုယ့်ကိုယ်ကို ယုံကြည်မှုရှိဖို့ဆိုတာကတော့ ကလေးမိဘတွေရဲ့ ပဲ့ကိုင်ထိန်းသိမ်းမှုနဲ့ တိုက်ရိုက်သက်ဆိုင်နေပါတယ်။
ရတု (Burmesehearts.com)
