အချစ်စစ်ကိုရှာဖွေရင်း အချိန်တွေကုန်မှာစိုး

သမီးကညာအခါမလင့်စေနဲ့ စကားဟာ မိန်းကလေးတွေ အရွယ်မလွန်ခင် အိမ်ထောင်ရက်သားပြုဖို့ မိဘတွေကို တိုက်တွန်းထားတာပါ။ ကျွန်မသဘောကတော့ အိမ်ထောင်ပြုဖို့ ရည်ရွယ်ချက်ရှိထားတဲ့ မိန်းကလေးဟာ ကိုယ့်ဘဝအဖော်မွန်ကို မျက်စိဖွင့် နားစွင့်ပြီး နှလုံးကားကော ၊ ဦးနှောက်ပါသုံးလို့ ရွေးချယ်စေချင်ပါတယ်။ ဘာဖြစ်လို့ နှလုံးသားကော ၊ ဦးနှောက်ပါ သုံးခိုင်းသလဲဆို တဖက်ကန်းနေမှာစိုးလို့ဖြစ်ပါတယ်။

ပိုရှင်းအောင်ပြောရရင် နှလုံးသားခံစားချက်ကိုချည်းနားထောင်ရင် ဦးနှောက်က သတိပေးနေနိုင်တာတွေကို လျစ်လျူရှုရှေ့ဆက်လို့ အိမ်ထောင်ရက်သားကျပြီးမှ ခြေလှမ်းတွေလွန်လို့ အပျိုလည်းပြန်မဖြစ်နိုင် ၊ တည်ပြီးသားအိမ်ထောင်ရေးမှာလည်း မပျော်မွေ့ ၊ ခင်ပွန်းတာဝန် ကလေးတာဝန် အိမ်ဝေယျာဝစ္စ စီးပွားရေးကိစ္စတွေနဲ့ ဖြစ်သင့်သော ဘဝပျော်ရွှင်မှုဆိုတာတွေကို မခံစားလိုက်ရဘဲ လုံးပါး ပါးသွားနိုင်လို့ဖြစ်ပါတယ်။

ဦးနှောက်ချည်းပဲတွက်ချက်သုံးလို့ အိမ်ထောင်ပြုပြန်တော့ မေတ္တာတရားရဲ့ အနှစ်သာရဆိုတာကို ကိုယ်တိုင်က ဘယ်လိုဂရုတစိုက်ပေးရမှန်းမသိ ၊ ဦးနှောက်နဲ့ တွက်ချက်ယူခဲ့တဲ့ကိုယ့်ကို ကိုယ့်အိမ်ထောင်ဘက်က စိတ်ကုန်လာတဲ့တနေ့မှာ ငွေပုံပေါ်ထိုင်ပြီး စိတ်ဆင်းရဲရတဲ့ ဘဝမျိုးလည်း ကြုံနိုင်ပါတယ်။ ဒါကြောင့် နှလုံးသားကော ၊ ဦးနှောက်ပါ ဟန်ချက်ညီညီ ခံစားတွေးခေါ်ပါမှ ပျော်ရွှင်တဲ့အိမ်ထောင်ရေးဆိုတာကို ခံစားကောင်း ခံစားနိုင်မှာဖြစ်ပါတယ်။ အနာဂါတ်ဆိုတာ မရေရာလှတာမို့  နှလုံးသားကော ၊ ဦးနှောက်ပါသုံးရင် ပျော်ရွှင်သာယာတဲ့အိမ်ထောင်ရေး လုံးဝရရှိစေမယ်လို့တော့ ဘယ်သူမှ အာမ မခံနိုင်ကြပါဘူး။ လူဆိုတာ ပြောင်းလဲတတ်တဲ့သဘာဝရှိတာကိုး။ သူလည်းပြောင်းလဲနိုင်တယ်။ ကိုယ်လည်း ပြောင်းလဲလာနိုင်တယ်လေ။

ကိုယ်တိုင်က အိမ်ထောင်သားမွေးပြုတာကို စိတ်မဝင်စားလို့ပဲဖြစ်ဖြစ် ၊ အကြောင်းကြောင်းကြောင့် ကွဲကွာသွားခဲ့သူကို မေ့မရလို့ ၊ သူ့နေရာအစားထိုးမရလို့ပဲဖြစ်ဖြစ် တသက်တာ လုံးဝ တကိုယ်ရည်နေပြီး အရိုးထုတ်တော့မယ်လို့ ဆုံးဖြတ်ထားရင်တော့ တမျိုးပေါ့။ ဒီလိုမဟုတ်ဘဲ ငယ်ငယ်ကတော့ ဟိုလူ့ရွေးရကောင်းနိုး ၊ ဒီလူ့ရွေးရကောင်းနိုး ၊ အိမ်ထောင်ပြုချင်သလိုလို မပြုချင်သလိုလို ၊ စိတ်ပဲမဝင်စားသလိုလိုနဲ့ ဆုံးဖြတ်ချက်မပြတ်သားလှဘဲ အရွယ်လွန်ကာနီးမှ အနားရှိရာနဲ့ငြိပြီး မဖြစ်သင့်တာတွေ ဖြစ်သွားတတ်တဲ့ အပျိုကြီး ၊ လူပျိုကြီးတွေအကြောင်းလည်း ကြားဖူး ၊ မြင်ဖူးတာမို့ ဒီလိုတော့လည်း မဖြစ်စေချင်ပါဘူး။ တလျောက်လုံးထိန်းထားခဲ့တဲ့ ဂုဏ်သိက္ခာ ဒီအရွယ်ကြီးကျမှ ဒီတခုအတွက် ကျသွားရတယ်ဆိုတာမျိုးက မဖြစ်သင့်ဘူးလေ။

တကယ်ဆို တစ်ယောက်တည်းနေသွားတာက အများအမြင်မှာ အဖော်မစုံ အထီးကျန်သလိုလိုရှိပေမယ့် လင်ပူ ၊ သားပူ ဖြစ်နေတဲ့ အိမ်ထောင်သည်တွေထက်တော့ အများကြီးသာတယ်လေ။ အိမ်ထောင်သည်တိုင်းဟာ အိမ်ထောင့်သုခနဲ့ မိသားစုပျော်ရွှင်မှုဆိုတာကို ခံစားရတာမဟုတ်ဘဲ အဖော်မွန်ကောင်းနဲ့ ပေါင်းဖက်မိတဲ့ အိမ်ထောင်သည်တွေသာ အိမ်ထောင့်သုခနဲ့ မိသားစုပျော်ရွှင်မှုဆိုတာကို ခံစားရတာဖြစ်ပါတယ်။

ကျွန်မကို တခါတရံ တကိုယ်တည်းအားငယ်မိတယ်လို့ ရင်ဖွင့်ဖူးတဲ့ သူငယ်ချင်းမတစ်ယောက်ကို လင်ပူ ၊ သားပူမိနေတဲ့ သူတွေရဲ့အဖြစ်တွေကို ပြောပြတာမျိုး ၊ ပေးဖတ်တာမျိုးလုပ်လိုက်တော့ သူ့ဘဝ ဘယ်လောက်ငြိမ်းချမ်းနေတယ်ဆိုတာကို သူ့ဘာသာ ခံစားမိတော့တယ်။ အိမ်ထောင်ဆိုတာ ကောင်းမွန်တဲ့အိမ်ထောင်ဘက်နဲ့ဆို တော်သေးရဲ့ ၊ မကောင်းတဲ့အိမ်ထောင်ဘက်ကို မနှစ်မြို့ဘဲပေါင်းနေရတာထက်စာရင် အပျို ၊ လူပျိုဂုဏ်လေးက ကိုယ့်အတွက် ပိုတင့်တယ် ၊ အေးချမ်းလှပါတယ်။

တချို့ကျတော့ သစ္စာတရားကို ခုတုံးလုပ်သူတွေနဲ့ တွဲနေမိလို့ မကုန်သင့်ဘဲ အချိန်တွေကုန်သွားခဲ့ရတာ ၊ ဒီတစ်ယောက်ကိုပဲ အချိန်ပြည့်အာရုံစိုက်နေရတော့ ကိုယ့်အပေါ် ဒီ့ထက်ပိုကောင်းနိုင်တဲ့သူ (ပိုချစ်နိုင်တဲ့သူ) ကိုယ့်အနားရှိနေသည့်တိုင် သတိမထားမိတာ ၊ တန်ဖိုးမထားမိတာတွေကြောင့် တွဲနေတဲ့သူနဲ့လွဲချိန်မှာ အလွမ်းတွေ ၊ အဆွေးတွေ ၊ စိတ်ဒဏ်ရာတွေကို ပြန်ကုစားရင်း အချိန်လွန်သွားတာတွေလည်း တွေ့ဖူးတယ်။

အမျိုးသမီးတွေဆိုတာ ပင်ကိုယ်စိတ်ရင်းက သနားတတ်ပြီး နူးညံ့တဲ့စိတ်သဘောထားရှိသူတွေများတာမို့ ကိုယ့်အပေါ်နည်းနည်းကောင်းရင် အားနာတာနဲ့ ၊ သနားတာနဲ့ ၊ ကိုယ်ချင်းစာတာတွေနဲ့ တကယ်ပဲ ကိုယ့်အပေါ် တကယ်ချစ်သူ ၊ အနစ်နာခံတဲ့သူဆိုရင် သံယောဇဉ်လေးရစ်တွယ်မိတာနဲ့ ချစ်တယ်ရယ်လို့ ဖြစ်သွားတတ်တယ်။ ဒီလိုသဘောမျိုးရှိတာမို့ တကယ်ပဲ အိမ်ထောင်ဘက်ကောင်းနဲ့ စုံဖက်ချင်တဲ့ အမျိုးသမီးတွေဟာ ကိုယ့်အပေါ် တသက်တာ ကောင်းတဲ့သူကို ဦးစားပေးရှာရမှာဖြစ်ပါတယ်။

ပြောတော့လွယ်လွယ်လေး ၊ တကယ်ကောင်းတဲ့သူက ဂျိုပေါက်နေတာမျိုးမဟုတ်တာမို့ တသက်တာကောင်းသွားနိုင်တဲ့သူဆိုတာကို ဘယ်လိုရွေးချယ်မလဲနော်။ ကျွန်မကိုယ်တိုင် နှလုံးသားခံစားချက်ကို ရှေ့တန်းတင်ပြီး ကိုယ်တွေနှစ်ဦးရဲ့ အချစ်ကိုယုံကြည်လို့ သစ္စာတရားကိုအားကိုးပြီး တဦးတယောက်အတွက် ဆယ်စုနှစ်တခုနီးပါးလောက် အချိန်တွေကုန်ခဲ့ဖူးတယ်။ အခုလိုအချိန်မှာ ဒီအချိန်တွေ ပြန်ယူခွင့်ရရင် ဒီအဖြစ်အပျက်ကြီး ပြောင်းလဲလိုက်ချင်သလားဆို ဒီအတိုင်းပဲထားလိုက်ပါလို့ ကျွန်မဆိုမှာပါ။ ထားပါတော့။

ဒီတစ်ယောက်နဲ့ အမျိုးသားတွေရဲ့အချစ်ကို အတော် စိတ်ကုန်သွားခဲ့တဲ့ကျွန်မ တယောက်တည်းအရိုးထုတ်ရကောင်းနိုး ၊ သူနဲ့လွဲသွားလို့ ဘယ်သူ့မှကိုယ့်ယူတဲ့သူမရှိတော့ဘူးလို့လည်း သူအပါအဝင် သူများတွေထင်မှာစိုး ၊ သူ့ထက် ကိုယ့်အပေါ် ပိုကြင်နာတဲ့သူတွေရှိနေသေးတယ်ဆိုတာလည်း သက်သေပြချင် ဒီလိုအတွေးတွေ ၊ ဒီလိုစိတ်တွေနဲ့ ကိုယ့်ကို တသက်တာ ချစ်မြတ်နိုးနားလည်လို့ သည်းခံပြီး သစ္စာရှိရှိပေါင်းသွားမယ့် အဖော်ကောင်းဆိုတာကို စမ်းသပ်ရှာဖွေခဲ့ပါတော့တယ်။

အဖော်ကောင်းလို့ ဘယ်လို စမ်းသပ်ရှာဖွေသလဲ သိချင်ကြမှာပဲနော်။ ကျွန်မရဲ့ခံယူချက်က ရှင်းပါတယ်။ ကိုယ်အခုလို ငယ်တုန်း ၊ လှတုန်း ၊ ဆွဲဆောင်မှုရှိတုန်း ၊ တက်နေတဲ့အရွယ် ၊ သူနဲ့မယူရသေးတဲ့ အပျိုဘဝမှာတောင် ကိုယ့်အပေါ်ကို စိတ်မရှည် ၊ သည်းခံနိုင်စွမ်းမရှိတဲ့သူနဲ့ လက်ဆက်ပေါင်းသင်းမိရင် ကိုယ်အိုလာတဲ့အခါ ၊ ရုပ်ရည်က ဆွဲဆောင်မှုမရှိတော့ဘဲ အလှအပတွေ ယိုယွင်းလာတဲ့အခါ ၊ သူနဲ့ ဆယ်စုနှစ်တွေ ဖြတ်သန်းပြီးတဲ့အခါမှာ သူဟာ ကိုယ့်အပေါ်ကို အရင်လို နားလည်စွာ စိတ်ရှည် သည်းခံနိုင်ပါတော့မလား။သေချာတာကတော့ ဆယ်စုနှစ်မပြောနဲ့ ငါးနှစ်လောက်အတွင်း သူမပြောင်းလဲရင် ကိုယ်တော်တော် ကံကောင်းလို့ပဲလေ။ ဒီတော့ ကိုယ်ရွေးချယ်မယ့်သူရဲ့ ကိုယ့်အပေါ်ကို နားလည်နိုင်စွမ်း ၊ ယုံကြည်နိုင်စွမ်း ၊ သည်းခံနိုင်စွမ်း ၊ သစ္စာရှိနိုင်စွမ်းဆိုတာ ရေရှည်လက်တွဲဖို့ စဉ်းစားတဲ့သူတိုင်းကို စတင်လေ့လာစမ်းသပ်တော့တာပဲ။

အစမ်းသပ်ခံခဲ့ရတဲ့ အမျိုးသားတွေအတွက်တော့ မသက်သာလှဘူးပေါ့။ မတတ်နိုင်ဘူးလေ။ ကိုယ်နဲ့ တသက်တာပေါင်းဖက်ချင်တယ်ဆို ဒီလောက်တော့ သည်းခံစိတ်ရှည်ရမယ်ထင်တာပဲ။ ဒါမှလည်း ကိုယ့်တသက်တာ စိတ်ချရမှာမဟုတ်လား။ ကျွန်မကို စိတ်ဝင်စားကြောင်း ပြသလာတဲ့သူ ၊ ချစ်ရေးဆိုထားတဲ့သူ ၊ ချစ်သူရည်းစားအဖြစ်တွဲနေတဲ့သူဆို သူတို့နဲ့ ချိန်းတဲ့အချိန်တွေကို နေပြင်းချိန်မှာ ၊ မိုးသည်းချိန်မှာ ချိန်းဆိုပြီး တခါတလေသွား ၊ တခါတလေ မသွားတာမျိုးလုပ်တယ်။ တခါတလေ ကိုယ်ကသွားပေမယ့် တနေရာကနေ သူ့အခြေအနေကို သူမသိအောင် စောင့်ကြည့်တာမျိုးလည်းလုပ်တယ်။

ဒီလိုဆို သူ့သည်းခံနိုင်ရည် ပါးပါးလေးကို စမ်းသပ်နိုင်ပြီး သူ့စိတ်တိုင်းကျမဖြစ်တဲ့အချိန်တွေမှာ သူဟာ အရွဲ့တိုက်တတ်သလား ၊ ဒေါသတကြီးတုန့်ပြန်တတ်သလား ၊ မောက်မောက်မာမာ ဆက်ဆံတတ်သလား ၊ ကိုယ့်အပေါ်ကို ဘယ်လောက်အထိ သည်းခံနိုင်ပြီး ကိုယ်ရှင်းပြမယ့် စကားလုံးတွေ ၊ အကြောင်းပြချက်တွေဆိုတာကို နားထောင်သလဲ ၊ နားထောင်ပေးချင်စိတ်ရှိသလဲ ၊ ဘယ်လောက်အထိ နားလည်ပေးလိုစိတ်ရှိသလဲဆိုတာကို စမ်းသပ်ခဲ့တာပါ။ ဒီလိုမစမ်းသပ်ခဲ့ဖူးဆိုရင် ကိုယ်နဲ့ရှိချိန်တိုင်း ပြုံးနေမယ့် သူ့အပြုံးတွေသာ ကိုယ်ခံစားနိုင်ပြီး နောင်အိမ်ထောင်ကျတဲ့အခါ ကြုံတွေ့လတ္တံသော နှစ်ဦးအဆင်မပြေမှုဆိုတာတွေ ၊ ကိုယ့်ဘက်က အမှားတွေကို သူဘယ်လိုတုန့်ပြန်မလဲလို့ စေ့စေ့စပ်စပ် ဘယ်ခံစားသိနိုင်ပါ့မလဲနော်။

တခါတလေ တခြားအမျိုးသားလေးတွေနဲ့ အလုပ်သဘောအရ ၊ ခင်မင်မှုအရ သူ့ထက်ပိုဦးစားပေးလိုက်ဖြစ်တဲ့ အနေအထားတွေကိုလည်း ဖန်တီးဖြစ်တယ်။ ဒါကတော့ သူဟာ ကိုယ့်အချစ်အပေါ်မှာ ၊ ကိုယ့်သိက္ခာနဲ့ စာရိတ္တအပေါ်မှာ ဘယ်တော့အထိ ယုံကြည်မှုထားသလဲ ၊ ကိုယ့်အပေါ် ဘယ်လောက်အထိ နားလည်မှုပေးနိုင်သလဲ ၊ ဘယ်လောက်အထိ ခွင့်လွှတ်သည်းခံနိုင်စွမ်း ထားရှိသလဲဆိုတာ စမ်းသပ်တာဖြစ်ပါတယ်။

ကျွန်မက ကျွန်မကို ချုပ်ချယ်တာမျိုးမကြိုက်သူမို့ သူ့အပေါ်ကိုလည်း လွတ်လပ်ခွင့်အပြည့်အဝကို ပေးထားတယ်။ ဒီလိုပေးထားတဲ့နေရာမှာ သူငယ်ချင်းမိန်းကလေးတွေ ၊ အမျိုးသမီးလုပ်ဖော်ကိုင်ဖက်တွေရဲ့ ဆက်ဆံရေးဆိုတာကို ဝင်စွက်ဖက်ခြင်းမလုပ်သလို သူ့ဖုန်းကိုစစ်တာ ၊ သူ့ပိုက်ဆံအိတ်စစ်တာ ၊ ဟိုမေးဒီမြန်းနဲ့ မယုံမကြည်စစ်ဆေးတာတွေလည်း မလုပ်ဘူး။

ကိုယ့်သူငယ်ချင်းမချောချောလေးတွေနဲ့ သူ့ကိုမိတ်ဆက်ပေးသလို လမ်းသွားလမ်းလာတွေ့ရှိတဲ့ မိန်းကလေးချောချောလေးတွေကို သူမမြင်ရင်တောင် လှလိုက်တာလို့ရေရွတ်ပြီး သူကြည့်မိအောင် ကြိုးစားဖြစ်တယ်။ ကျွန်မသိချင်တာကတော့ အမျိုးသမီးတွေရဲ့ ဆွဲဆောင်မှုအပေါ် သူဘယ်လောက်အထိ တောင့်ခံနိုင်သလဲဆိုတာ သိချင်တာပါ။ ကျွန်မနဲ့ မပေါင်းခင်ကတောင် တခြားအမျိုးသမီးတွေရဲ့ ဆွဲဆောင်မှုမှာ တောင့်မခံနိုင်ရင် ၊ သစ္စာမထားနိုင်ရင် အိမ်ထောင်ကျပြီးရင် ဘယ်လိုနေမလဲဆိုတာ သိရအောင် သူနဲ့ပေါင်းဖို့မလိုတော့ပါဘူး။ သေချာပေါက် ဖောက်ပြန်မယ့်သူလေ။ ဒီလိုလူမျိုးတော့ ကန်တော့ဆွမ်းပေါ့နော်။

ကိုယ်တိုင်က အသောက်အစား ၊ လောင်းကစားနဲ့ အပျော်အပါးတွေဆိုတာကို စိတ်အပါကြီးမရှိပေမယ့် စိတ်ပါသယောင် သူ့ကိုပါလှမ်းဆွယ်တာမျိုးလည်း လုပ်တတ်သေးတယ်။ တကယ်ဇရှိတဲ့သူက အစလေးဖော်လိုက်တာနဲ့ ဇ ပေါ်လာတတ်တယ်မဟုတ်လား။ ဝါသနာဆိုတာဟာ ရေရှည်မှာ အယောင်ဆောင် ဖုံးကွယ်ရကောင်းရိုး ထုံးစံမရှိဘူးလေ။ အခါအခွင့်သင့်လို့ ရာသီဥတု ကိုယ့်ဘက်ပါတယ်ဆိုတာနဲ့ ဝါသနာဗီဇတွေ တဖွားဖွားပေါ်လာတတ်တာမို့ ဒီလိုစမ်းသပ်တာပါ။ အတိုင်းအတာတခုအထိ ခွင့်လွှတ်ပေးရမယ်ဆိုတာ နားလည်ထားပေမယ့် ကိုယ့်နားလည်ခွင့်လွှတ်ပေးနိုင်စွမ်းဘောင်ကို ကျော်နေနိုင်သူ ၊ ဒီဘက်မှာ ဇရှိနေသူဆိုတာ သိလိုက်ရင်တော့ ကံကို ကိုယ့်ဘဝနဲ့ လောင်းကြေးမထပ်ဘူးလေ။

ဒီလို ဒီလိုတွေ စမ်းသပ်ပြီးတဲ့နောက်မှာ အသင့်တော်ဆုံးဖြစ်တဲ့ (လက်ရှိခင်ပွန်းဖြစ်လာမယ့်သူ)ကို ရွေးချယ်လက်တွဲခဲ့တာပါပဲ။ ချစ်တာနဲ့ သံယောဇဉ်လေးလည်း ပါတာပေါ့။ ဒီလိုစမ်းသပ်နေလို့ ရည်းစားတွေအများကြီး တပြိုင်တည်းထားရတာလားဆို မဟုတ်ပါဘူး။ မျက်နှာများစရာမလိုဘူး။ ကိုယ်က သစ္စာရှိတဲ့သူလိုချင်ရင် ကိုယ်တိုင်ကလည်း သစ္စာရှိရမယ်လေ။ ဒီလိုစမ်းသပ်မှုတွေ ပြုလုပ်နေစဉ်မှာ သူနဲ့ကိုယ် ရည်းစားဖြစ်နေရမယ်လို့လည်း မဆိုလိုဘူး။

ကိုယ့်ကိုစိတ်ဝင်စားလို့ ကိုယ့်အနားကပ်နေပြီ ၊ ခွါရလည်းခက် ၊ ငြင်းလို့လည်းမရ ၊ ငြင်းလို့လည်းမကောင်း ၊ သူ့အကြောင်းပိုသိချင်လာရင် အဲဒီအမျိုးသားကို သူအကြောင်း ပိုသိလာအောင် ၊ ကိုယ်နဲ့ စိတ်သဘောချင်း ကိုက်ညီသူ ဟုတ် မဟုတ် ပိုသိလာအောင် ၊ ကိုယ့်တဘဝလုံးစာအတွက် အဖော်ကောင်း ဟုတ် မဟုတ် ပိုသေချာရအောင် စမ်းသပ်တာပါပဲ။ သိုးရေခြုံထားတဲ့မြေခွေးတွေကတော့ ဒီစမ်းသပ်မှုလေး မပြင်းမီမှာတင် တပ်ခေါက်နောက်ဆုတ် လမ်းခွဲသွားမှာဖြစ်ပါတယ်။ လွတ်တဲ့ငါးမကြီးနဲ့ ၊ ဒီလိုလူမျိုးနဲ့ မယူဖြစ်တာပဲ ကျေးဇူးတင် ၊ ဒီလိုလူမျိုးနဲ့လွဲသွားပေမယ့် ကိုယ့်အပေါ် တကယ် ချစ်မြတ်နိုး ၊ သစ္စာရှိ ၊ တာဝန်သိတဲ့သူနဲ့ လက်တွဲခွင့်ရှိသေးတယ်။ အဖော်ကောင်းနဲ့ တသက်တာ ပျော်ရွှင်နိုင်တဲ့ အခွင့်အရေးရှိသေးတယ်။

ပျိုမေတိုင်းကိုလည်း ဟိုလူကောင်းနိုး ၊ ဒီလူကောင်းနိုး တွဲရင်း ၊ ရွေးရင်းကနေ တန်ဖိုးရှိတဲ့ ဘဝအချိန်တွေ မကုန်စေချင်တဲ့အတွက် ဒီပို့စ်ကိုရေးလိုက်တာဖြစ်ပါတယ်။ ပျော်ရွှင်တဲ့အိမ်ထောင်ရေး ထူထောင်လိုတဲ့ပျိုမေတိုင်း ပျော်ရွှင်သာယာတဲ့ မိသားစုဘဝလေး ရရှိကြပါစေလို့ ဆုတောင်းပေးလိုက်ပါတယ်။

ရတု (Burmesehearts.com)