(၁၄)လအရွယ် ကလေး၏ ဖွံ့ဖြိုးတိုးတက်မှု

ဒီအရွယ်မှာကလေးဟာ ခွက်ထဲကအရည်တွေနဲ့ ရေကို သူ့ဘာသာ ထိန်းထိန်းသိမ်းသိမ်း သောက်တတ်လာပါပြီ။ ဒါပေမယ့် တချို့ကလေးတွေကတော့ ဗူးနဲ့သောက်ရတာကိုမှ အာသီသရှိနေတာလဲ ဖြစ်နိုင်ပါသေးတယ်။ ရေကို ခွက်နဲ့အလွတ် သောက်တတ်လာဖို့ နည်းနည်းချင်း ကျင့်ယူပေးရမှာဖြစ်ပါတယ်။ ပထမအစပိုင်းမှာ နို့သီးခေါင်းတပ်ဗူးနဲ့ သောက်လေ့ရှိရင် နောက်ပိုင်းမှာ ထိပ်ဝ အပေါက်ကလေးတွေပါတဲ့ ဗူးပုံစံမျိုးနဲ့ ပြောင်းတိုက်ပါ။

စုပ်သောက်ရတာချင်းတူပေမယ့် နို့သီးခေါင်းတပ်က တပေါက်တည်းပါပြီး ဗူးထိပ်ဝ အပေါက်ကလေးတွေပါတာက နှစ်ပေါက်ကနေ သုံးပေါက်ဖြစ်လာတဲ့အတွက် စုပ်အားနဲ့ စီးဝင်တဲ့ ရေအလျင်ကို သူ့ဘာသာ ထိန်းထိန်းသိမ်းသိမ်း သောက်တတ်လာမှာပါ။ ဒါနဲ့အသားကျလာရင် ပိုက်တပ်ဗူးလေးတွေ ၊ ထိပ်ဝ အပေါက်ကြီးကြီးပါတဲ့ဗူးလေးတွေနဲ့ ရေကို ကျင့်တိုက်ပြီး ခွက်နဲ့ (သို့မဟုတ်) ဗူးလိုက် မော့သောက်တတ်ဖို့ ကျင့်ပေးရမှာပါ။ ဒါက ကလေးရေမသီးအောင် လေ့ကျင့်ပေးတာပါ။ ရေမသီးရုံတင်မဟုတ်ဘူး။ အတိုင်းအတာကို စိတ်နဲ့ကိုယ် ဘယ်လိုကပ်ပြီး ထိန်းထိန်းသိမ်းသိမ်း ကိုင်တွယ်ရယူတတ်ရမယ်ဆိုတာကိုလည်း တနည်းအားဖြင့် သင်ပေးလိုက်တာပါ။

ဒီအရွယ်ကလေးတွေဟာ လူကြီးတွေလို တထိုင်တည်းမှာ အများကြီးတဝစားတာမျိုး လုပ်ချင်မှ လုပ်မှာပါ။ အများကြီးတထိုင်တည်းမစားတဲ့ကလေးကို မစားရကောင်းလား မဆူ ၊ မရိုက်ပါနဲ့ ။ သူမစားချင်တဲ့အချိန် မစားချင်တာကို အတင်းမကျွေးပါနဲ့။ ထမင်းစားမှ အားဖြစ်တာမျိုးမဟုတ်ဘဲ ဆန်နဲ့လုပ်တဲ့မုန့် ၊ ဂျုံနဲ့လုပ်တဲ့မုန့် စသဖြင့် သူစားတတ်တာလေးတွေကို သူကစားနေတုန်း သူ့အနီးအနား ထားပေးထားမယ်ဆိုရင်လည်း ကစားလိုက် ၊ သတိရလိုက် စားလိုက်နဲ့ ဗိုက်ထဲဝင်သွားပြီး ဗိုက်ဝမှာပါ။ အာဟာရဖြစ်မှာပါ။ ဒီအတိုင်းကျွေးလို့ အသီးအနှံတွေ မစားရင် သူကစားနေတုန်းမှာ သူနဲ့ကစားရင်း ကျွေးတတ်ရင် စားမှာပါ။ ဒီအရွယ်ကလေးကို ကျွေးတယ်ဆိုတာ ကလေးစားတတ်အောင် ၊ စားချင်အောင် ဆွဲဆောင်ကျွေးရမှာပါ။ လူကြီးတွေလို ရော့ အင့် ချပေးထားတာမျိုး ၊ ကလေးကြီးတွေလို ခွံ့ကျွေးတာမျိုးတွေ အတင်းလုပ်ယူလို့ မရပါဘူး။

ကိုယ့်ဘာသာရပ်နိုင်လာ ၊ ဖျတ်ဖျတ်လတ်လတ် တွားသွားနိုင်လာပြီး တချို့က လမ်းပါလျှောက်နိုင်လာပြီဖြစ်တဲ့ ဒီအရွယ်မှာ ဟိုဟို ဒီဒီ အနားမနေဘဲ လူးလာခတ် သွားလိုက် ၊ ဆွဲလိုက် ဖြစ်နေမှာပါ။ ကလေးဟာ ကိုယ်ပြောတာတွေ လိုက်နာချင်မှ လိုက်နာမှာဖြစ်ပေမယ့် ကလေးဟာ ကိုယ်ပြောတဲ့ စကားလုံးအတော်များများကို ဒီအရွယ်မှာ နားလည်နေပြီဖြစ်ပါတယ်။ ဒါကြောင့်လည်း သူဘာလိုချင်တယ် ၊ ဘာဖြစ်ချင်တယ်ဆိုတာ လူကြီးမိဘတွေ ဖြည့်ဆည်းပေးနိုင်အောင်လက်ညှိုးတစ်ချောင်းနဲ့ ထိုးထိုးပြနေတာပေါ့။

မယူသင့်တဲ့အရာ ၊ မကိုင်သင့်တဲ့ဟာ ၊ မဖြစ်သင့်တာတွေ တောင်းယူခိုင်းနေရင် ၊ ဂျီကျပူဆာနေရင် လူကြီးမိဘတွေအတွက် အတော် စိတ်တိုတောင်းစရာ ဖြစ်နေမှာပါ။ ကလေးကို နားလည်ပေးလိုက်ပါ။ နှစ်နှစ်အောက်ကလေးငယ်တွေရဲ့ အသိထဲမှာ သူတို့လိုချင်တာ သူတို့ရ ရမယ်ဆိုတဲ့ အသိကလေးပဲ ရှိပါသေးတယ်။ သင့်တာ ၊ မသင့်တာ သူတို့မတွေးတတ်သေးတာမို့ မသင့်တဲ့အရာတွေကို မလုပ်ပေး ၊ သူ့လက်ထဲမပေးချင်သည့်တိုင် သူစိတ်ကျေနပ်နိုင်စရာ အခြားတခုခုကိုတော့ သူ့လက်ထဲ ထည့်ပေးလိုက်ပါ။

ကလေးကို သူ့ကိုယ်သူ ထိန်းထိန်းသိမ်းသိမ်းနဲ့ လမ်းမြန်မြန် လျှောက်တတ်စေချင်ရင် လမ်းလျှောက်သင်နေချိန်မှာ နဲ့ သူစမ်းပြီး လမ်ေးလျှာက်ဖို့ ကြိုးစားချိန်တွေမှာ သူ့ခြေဖဝါး ၊ ခြေချောင်းလေးတွေကို ကြမ်းပြင် (သို့မဟုတ်) မြေပြင်နဲ့ ထိတွေ့ခွင့်ပေးပါ။ တကယ်လို့များ ခြေအိတ်တွေနဲ့ ဖိနပ်တွေက သူ့ခြေဖဝါးကို ချုပ်ထားသလို ဖြစ်နေမယ်ဆိုရင် သူဟာ လမ်းလျှောက်နိုင်ဖို့ နှောင့်နှေးနေဦးမှာဖြစ်ပါတယ်။ ဒီအရွယ်တွေ လမ်းမြန်မြန်လျှောက်တတ်ဖို့ဟာ ခြေဖဝါးနဲ့ ခြေချောင်းလေးတွေ လွတ်လပ်စွာ လှုပ်ရှားခွင့်ရပြီး သူ့ကိုယ်အလေးချိန်ကို လမ်းလျှောက်ရင်း မတ်မတ်ဖြစ်အောင် ထိန်းသိမ်းထားနိုင်ဖို့ လေ့ကျင့်ရမှာပါ။

သူလမ်းလျှောက်ကျင့်ရာ ပတ်ဝန်းကျင်မှာ ထိမိ ၊ ခိုက်မိ ၊ ဆောင့်မိစရာတွေ မရှိအောင်တော့ ဂရုစိုက်ပေးပါ။ လဲကျရင်မနာအောင် ဖန်တီးပေးထားနိုင်ရင် ပိုကောင်းပါတယ်။ လဲကျလို့ ထိခိုက်မိရင် ကလေးဒဏ်ရာအနာတရ ဖြစ်သွားမယ့်အပြင် ကလေးဟာ မိဘကမှအားမပေးရင် လမ်းလျှောက်ရင်းလဲပြို ထိခိုက်ဒဏ်ရာရမှာ ကြောက်နေပြီး လမ်းလျှောက်ဖို့ နှောင့်နှေးနေမှာဖြစ်ပါတယ်။ တချို့ကလေးတွေဟာ (၁၇)လ ၊ (၁၈)လတိုင်အောင် လမ်းမလျှောက်တတ်ကြပါဘူး။ ဒါကြောင့် လမ်းမလျှောက်တတ်တဲ့ကလေးကို လမ်းလျှောက်ချင်စိတ် ကျင့်ပေးရမှာဖြစ်ပြီး ကလေးလမ်းမလျှောက်တတ်သေးလို့ ကလေးရော ၊ ကိုယ်ပါ စိတ်ဖိစီးမှုတွေ ရှိမနေဖို့ လိုပါတယ်။

ကလေးလမ်းကောင်းကောင်း လျှောက်တတ်ဖို့ဆိုတာဟာ သူ့ခြေဖဝါးလေးတွေက သူ့ကိုယ်အလေးချိန်ဒဏ် ခံနိုင်ပြီး ခပ်မတ်မတ်ကလေးဖြစ်အောင် ရပ်ပေးနိုင်မယ် ၊ မလဲပြိုအောင် ထိန်းပေးနိုင်မယ် ၊ လမ်းလျှောက်ခြေလှမ်းတဲ့ ယိမ်းထိုးမှုတွေကို ဟန်ချက်ညီညီ ထိန်းပေးထားနိုင်ဖို့လိုပါတယ်။ ဒါတွေကို ကလေးဟာ လမ်းလျှောက်ဖို့ ကြိုးစားရင်း သိနားလည်သွားမှာပါ။

ဒီအရွယ်မှာ စကားလုံးသိပ်များများစားစား မပြောနိုင်သေးပေမယ့် သူ့ကိုအပြောများတဲ့ စကား တလုံးစ ၊ နှစ်လုံးစကို လိုက်မှတ်သားပြီး ပြောဖို့ ကျင့်ယူနေပါတယ်။ များများသိစေချင်ရင် သူ့ကို စကားများများပြောပေးပါ။ ဒီအရွယ်မှာ ကလေးမကြားချင်ဆုံးစကားက “NO” လို့ အဓိပ္ပါယ်ရတဲ့ “ဘူး”ဆိုတဲ့ စကားလုံးပါပဲ။ ဘာဖြစ်လို့လဲဆိုရင် သူ့ကိုလူကြီးတွေက ဟိုဟာဆိုလည်း မလုပ်ရဘူး ၊ ဒါဆိုလည်း မကိုင်ရဘူး စသဖြင့် “ဘူး”ဆိုတဲ့ စကားလုံးဆိုတာကို အချိန်တိုင်းလိုလို ကြားနေရတဲ့အတွက် ဒီစကားလုံးကို မကြားချင်ဆုံးဖြစ်ပါတယ်။ ဒုတ် ဒုတ် လို့ အပြောခံရပါများတဲ့ကလေးဟာ ဒုတ် ဒုတ်လို့ ပြန်ပြောတတ်လာမှာဖြစ်ပါတယ်။

ဒီစကားလုံးကနေစပြီး သူကြားတာတွေ ပြန်ပြောနိုင်ဖို့ ၊ သူမြင်တာတွေ အတုယူလိုက်လုပ်နိုင်ဖို့ ကလေးဟာ ကြိုးစားနေတာ သူ့အပြစ်မဟုတ်ပါဘူး။ မလုပ်ရဘူး ၊ မကိုင်ရဘူးဆိုတာထက် မလုပ်သင့်တဲ့အကြောင်း ၊ မကိုင်သင့်တဲ့အကြောင်းတွေကို ကလေးနားလည်အောင် ထပ်ခါထပ်ခါ လေသံချိုချိုလေးနဲ့ နာခံချင်အောင် ရှင်းပြရမှာဖြစ်ပါတယ်။ ကြားရဖန်များတော့ ဒါကြောင့် မလုပ်သင့် ၊ မကိုင်သင့်ဆိုတာကို ကလေးဟာ နားလည်သဘောပေါက်သွားပါတယ်။ ဒီလိုနားလည် သဘောမပေါက်သရွေ့  ကလေးဟာ သူလိုချင်တာ ၊ လုပ်ချင်ရတွေ ရရှိလုပ်ကိုင်နိုင်ဖို့ ကြိုးစားနေဦးမှာဖြစ်ပါတယ်။

ကျွန်မဆို ကိုယ်ခွဲမရှိတာမို့ ကျွန်မသမီးကို ဟင်းချက်ရင်းတဖက်နဲ့လည်း ထိန်းရတာပါ။ ကိုယ်တဖက်မှာ မအားမလပ်ဖြစ်နေရင် ပုံးတစ်ခုထဲ ဗူးလွတ်ခွက်လွတ်တွေပေးထားတယ်။ ကော်ဇွန်းထူထူ သူ့မရှနိုင်တာတွေ ပေးထားတယ်။ ဒါတွေကို သူက ထုတ်လိုက် ၊ ထည့်လိုက် ၊ ခလောက်လိုက် ကိုယ့်မျက်စိအောက် ကစားစေတယ်။ သူ့ဘာသာသူအလုပ်များနေအောင် အလုပ်ပေးထားလိုက်တော့ ကိုယ်မကိုင်စေချင်တာတွေ သူကိုင်ရကောင်းလား စိတ်တိုအော်ဟစ်နေစရာမလိုတော့ဘူး။ ဒီတော့ မီးဖိုချောင်ထဲမှာ သူလည်းပျော် ၊ ကိုယ်လည်း အလုပ်ပြီးစေတာပေါ့။

တခြားနေရာတွေမှာလည်း သူ့ဘာသာသူ ကစားရင်းပျော်နေတတ်အောင် ၊ ကိုယ်လည်း အလုပ်မပျက်အောင် ကလေးလည်းကြည့် အလုပ်လည်းလုပ် လုပ်ရမှာပါ။ ဟိုဟာဆိုလည်း မလုပ်ရဘူး ၊ ဒါဆိုလည်း မကိုင်ရဘူး စသဖြင့် လိုက်တားနေရရင် ကိုယ်လည်း အလုပ်မပြီး သူလည်းစိတ်တိုအော်ဟစ်ငိုနေတော့ ဘယ်အလုပ်ပြီးမလဲနော်။

ကလေးတွေကို ကောင်းမွန်တဲ့အလေ့အကျင့် ရှိစေချင်တယ်ဆိုရင် သူတို့နဲ့အနီးကပ်နေပြီး ကိုယ်သင်ပေးချင်တဲ့ ကောင်းမွန်တဲ့ အလေ့အကျင့် ၊ အပြောအဆို ဆိုတာတွေကို ကိုယ်တိုင်က လုပ်ပြရင်း သူတို့ကို ဒီလိုလုပ်ကိုင်ရမယ်လို့ ပြောဆိုသင်ပေးသင့်တာဖြစ်ပါတယ်။ သူတို့နဲ့ အတူစားမယ် ၊ သူတို့နဲ့အတူကစားမယ် ၊ သူတို့နဲ့ အတူအိပ်မယ်ဆိုရင် သူတို့နဲ့ဒီလိုအနီးကပ်ရှိနေနိုင်တဲ့ သူတွေဆီကနေ ပြောဆိုလုပ်ကိုင်ပုံ စရိုက်အမူအကျင့်ဆိုတာတွေကို ကလေးတွေက သင်ယူသွားတာဖြစ်ပါတယ်။ တံငါနားနီးတံငါ ၊ မုဆိုးနားနီး မုဆိုး ဖြစ်သွားတာပါ။

မကောင်းတဲ့အကျင့်နဲ့ အပြောအဆိုရှိသူတွေ ကလေးအနားမှာ ရှိနေခဲ့ပြီး ကလေးက ဒါတွေအကျင့်ဖြစ်သွားတော့မှ ကလေးကို ရိုက်နှက်ဆုံးမ ပြောင်းလဲခိုင်းတာထက် ဒီအကျင့်တွေ မဝင်ခင်ကတည်းက ကလေးကို အကျင့်ကောင်းတွေ အသားသေသွားအောင် သင်ပေးထားရမှာဖြစ်ပါတယ်။ ကောင်းတာကျင့် ၊ ကောင်းတာပြောတတ်တဲ့ ကလေးတစ်ယောက်ကို မကောင်းတာတွေ မပြောဖို့ ၊ မကောင်းတဲ့အမူအကျင့်တွေ မလုပ်ဖို့ဆိုတာ ထူးပြီး သင်ပေးစရာမလိုတော့ဘူးလေ။

ရတု (Burmesehearts.com)