class="post-thumbnail open-lightbox" href>
![](https://dlfwygjmxokwx.cloudfront.net/wp-content/uploads/2015/06/beach-love-couple1.jpg)
တသက်တာလက်တွဲဖို့ အားကိုးရသူ ဟုတ်ရဲ့လား
တသက်တာလက်တွဲဖို့ အားကိုးရသူ
ချစ်သူရည်းစားဘဝမှာ တဘက်သတ်ချစ်သူတို့ ၊ ကိုယ်ကချစ်ရတဲ့သူတို့ ၊ တဘဝလုံး ပေးဆပ်သွားမယ်တို့ စတဲ့ စကားလုံးလှလှတွေဟာ လက်ထပ်ယူပြီးတဲ့နောက် လအနည်းငယ်ကနေ နှစ်အနည်းငယ်အတွင်း မှိန်ဖျော့ပျောက်ကွယ်သွားတတ်တယ်။ ဒါဟာ မချစ်တော့လို့မဟုတ်သလို အချစ်လျော့လို့လည်း မဟုတ်ဘူး။ ဘဝတစ်ခုထဲကို လက်တွေ့ကျကျ တိုးဝင်လိုက်လို့ ဘဝမှာရုန်းကန်ရင်း ခင်ပွန်းရော ၊ ဇနီးပါ အနည်းနဲ့အများ ပြောင်းလဲသွားတာပါ။
အရင်ကလို သူ့ငွေသူသုံး ၊ ကိုယ့်ငွေကိုယ်သုံး ၊ ခဏချိန်းတွေ့ချိန် (သို့မဟုတ်) အတူနေချိန်မှာ စိုက်ထုတ်ပေးရုံလေးဟာ အပန်းမကြီးလှပေမယ့် တအိုးတအိမ် ထူထောင်လိုက်ပြီဆိုရင် အိမ်ထောင့်တာဝန်ဆိုတာ ကိုယ့်ပုခုံးပေါ် ဘုန်းကနဲပစ်ချလိုက်သလို ၊ ရင်ထဲတနင့်တပိုး ပစ်သွင်းလိုက်သလိုပါပဲ။ ဒါပေမယ့် ထူထောင်ထားတဲ့ အိမ်ထောင်တစ်ခု မပြိုကွဲချိန်အထိ ဒီတာဝန်ကြီးက ရုန်းထွက်သွားလို့မရဘူးနော်။ ပါးစပ်တစ်ပေါက် တိုးရင်တိုးသလို တာဝန်ပိုလာတာပဲရှိမယ်။ လျော့သွားတာမျိုးမရှိဘူး။
ရုန်းထွက်လိုက်တိုင်းလည်း အရင်လို စိတ်ရောကိုယ်ပါ လွတ်လပ်သွားတာမျိုး ၊ စင်းလုံးချောပြန်ဖြစ်သွားတာမျိုး မရှိဘူးနော်။ မိန်းမ ယောက်ျားမရွေး တခုလပ် ၊ နှစ်ခုလပ် စသဖြင့်သော အရပ်ဘွဲ့ဂုဏ်ထူးနဲ့ နေထိုင်သွားရလိမ့်မယ်။ မြန်မာလူမျိုးတွေဟာ တခုလပ်အမျိုးသမီးတွေကိုဆို တခုလပ်အမျိုးသားတွေထက် ပိုအထင်သေးကြတယ်။ နောက်တအိုးတအိမ် ထူထောင်မယ်ဆိုရင်တောင် အရင်အိမ်ထောင်ကွဲခဲ့တာကို ရမည်ရှာခံရပြန်ရော။ ဒါကြောင့် စင်းလုံးချော ပြန်မဖြစ်နိုင်ဘူးလို့ပြောတာ။
ပါးစပ်တစ်ပေါက် တိုးရင်တိုးသလို အိမ်ထောင့်တာဝန်ဆိုတာ ပိုလာတာပဲရှိမယ်။ လျော့သွားတာမျိုးမရှိဘူး။ ကိုယ်ရထားတဲ့လခသာ မတက်ရင်နေမယ် ကုန်ဈေးနှုန်းဆိုတာ အကျမရှိဘူး။ အိမ်လခဆိုတာ အကျမရှိဘူး။ မီးခွန် ၊ ရေခွန် ၊ ဖုန်းခွန်ကအစ စာအုပ်ငှါးခအဆုံး ဘာဈေးနှုန်းမှ အကျမရှိဘူးနော်။ ဒီတော့ သူ့ရဲ့ဝင်ငွေ ၊ ကိုယ့်ရဲ့ဝင်ငွေဆိုတာကိုပေါင်းပြီး တအိုးတအိမ်ထူထောင်ဖို့ အိမ်ငှါးခကအစ ဗာဟီရတွေအဆုံး စတင်တွက်ချက်ပါတော့လို့ အကြံပေးချင်ပါတယ်။
ဘဝဆိုတာ ရင်လောက်မှန်းမှ ဒူးလောက်ကျတာလေ။ လူဆိုတာ လှုပ်ရှားရုန်းကန်ရင်းကပဲ အခန့်မသင့်တာတွေ ကြုံတတ်တယ်။ ဥပမာ- သူ (သို့မဟုတ်)ကိုယ် အလုပ်ပြုတ်သွားနိုင်တာ ၊ ခြေလက်ဆုံးရှုံးသွားနိုင်တာ ၊ ကျန်းမာရေး ချို့ယွင်းသွားနိုင်တာ ၊ ဝင်ငွေနဲ့ ထွက်ငွေ မလောက်ငတော့တာကနေ အစစပေါ့။
ဒီလိုတွက်နေရင် တသက်လုံးအိမ်ထောင်မပြုနဲ့တော့လို့ ပြောစရာရှိတယ်။ ဒီလိုမတွက်ခဲ့ရင် ဒီလိုမျိုးအခြေအနေနဲ့ကြုံတဲ့အခါ ချစ်လှပါချည်ရဲ့ဆိုတဲ့စုံတွဲတွေဟာ ကလေးတွဲလွဲနဲ့ နေ့ညမရွေး တဂျိမ်းဂျိမ်းရန်ဖြစ်သွားကြတာ ကိုယ်တိုင်ကြုံရလိမ့်မယ်။
အိမ်ထောင်တစ်ခု တည်ငြိမ်ဖို့ဆိုတာ အိမ်ထောင်ဦးစီးဖြစ်သူရဲ့ဝင်ငွေဟာ တစ်မိသားစုလုံး စားလောက်နိုင်ဖို့ အရေးကြီးပါတယ်။ ဒီတော့ အမျိုးသမီးအလုပ်ထွက်လုပ်တဲ့ဝင်ငွေကို စုဆောင်းထားပြီး တိုးပွားအောင်လုပ်သွားတာမျိုးမဟုတ်တောင် ခင်ပွန်းဖြစ်သူ အလုပ်အဆင်မပြေတဲ့အခါ စုဆောင်းထားငွေထဲက ထုတ်သုံးနိုင်တဲ့အတွက် သူအလုပ်အဆင်မပြေတာ နားလည်မှုပေးလို့ရတယ်။
ဒီလိုမှမဟုတ်ဘဲ နှစ်ယောက်လုံး အလုပ်လုပ်ပါမှ အလျင်မီတယ်ဆိုတဲ့ ဝင်ငွေရှိသူများအဖို့ စုဆောင်းငွေဆိုတာ ဘယ်ရှိနိုင်ပါတော့မလဲ။ စုဆောင်းငွေမရှိတဲ့အခါ တစ်ဦးတစ်ယောက်ရဲ့ အလုပ်ချွတ်ချော်သွားရင် ၊ ကျန်းမာရေးမကောင်းရင် ၊ ကိုယ်လွယ်ထားတဲ့ ကိုယ်ဝန်ကမွေးလာမယ့်ကလေးအတွက် ဗာဟီရကုန်ငွေနဲ့ ကျောင်းထားစရိတ် ဒါတွေကို ဘယ်ကရမလဲနော်။ ချေးငွှးရတော့မယ်။ အကြွေးတွေဆပ်ရတော့မယ်။
အကြွေးပတ်လည်ဝိုင်းပြီး မိသားစုငွေ အလျင်မမီတဲ့ မိသားစုဟာ မိသားစုဦးရေ တိုးပွားလာတာနဲ့အမျှ ဒုက္ခတွေတိုးပွားလာမှာပဲ။ သူတို့မိသားစုရဲ့ အရှားပါးဆုံးအရာဟာ မိသားစုတွင်း ပျော်ရွှင်မှုပဲ ဖြစ်နေလိမ့်မယ်။ အကြွေးပတ်လည်နဲ့ စားမလောက်တဲ့ မိသားစုဟာ ရုပ်ရှင်ရုံကို အတူသွားကြည့်နိုင်ပါ့မလား ။ မိသားစုအားလပ်ရက်ခရီး ထွက်နိုင်ပါ့မလား။ မိမိရင်သွေးတွေကို ကစားကွင်းပို့နိုင်ပါ့မလား။ ဒီလိုမလုပ်နိုင်လို့ နောင်မှ တိုင်ပြည်ရဲ့စနစ်ကို လက်ညှိုးထိုးရမည်မရှာနဲ့။ စနစ်က ကိုယ်မမွေးခင်ကတည်းက ချွတ်ချော်ပြီးသား။ ကိုယ့်သားသမီးကိုကော ဒီလို ကျဉ်းထဲကျပ်ထဲ ချို့ချို့တဲ့တဲ့ ကြီးပြင်းစေမလားဆိုတာ မိမိတို့ဆုံးဖြတ်ချက်ပါ။
ဒီ့ထက် ဆိုးရွားတဲ့အခြေအနေမျိုးတွေမှာ ကိုယ့်သားသမီးကို ကျောင်းမထားနိုင်ဘဲ ကလေးအလုပ်သမားအဖြစ် အလုပ်ထွက်လုပ်ခိုင်းရတာလဲရှိမယ်။ ဒီလိုဆို ကိုယ်ဟာ မိဘတာဝန်ကျေရဲ့လား။ ကိုယ့်ကလေးပေါ်မှာ တရားပါရဲ့လား။
ဒါတွေဟာ မိမိအိမ်ထောင်ဘက်ဖြစ်လာမယ့် ကလေးရဲ့အဖေဟာ အားကိုးထိုက်သူဖြစ်ရဲ့လားဆိုတဲ့ မေးခွန်းတစ်ခုမှာတင် တွေ့ကြုံလာနိုင်တဲ့ အိမ်ထောင့်အခက်အခဲတွေဖြစ်တယ်။ No money, no honey ဆိုတာ ကြားဖူးကြမှာပေါ့။ နားလည်အောင်ပြောရရင် ငွေမရှိရင် ပျော်ရွှင်မှုမရှိဘူးဆိုတာပဲ။ (ငွေရှိတိုင်း ပျော်ရွှင်တယ်လို့ မဆိုလိုဘူးနော်။ ဒီအပိုင်းက နောက်မှလာမယ်။) အိမ်ထောင်တစ်ခု ပျော်ရွှင်တည်မြဲရေးဆိုတာ အိမ်ထောင့်ဝင်ငွေအပေါ်မှာ အများကြီး တည်မီနေလို့ ဒီမေးခွန်းရဲ့ နောက်ဆက်တွဲတွေကို စရှင်းပြရတာပါ။
ကိုယ့်ဗိုက်ထဲ ကလေးရှိတယ်ဆိုတာကို ဆီးစစ်ကြည့်တဲ့ မိခင်က အရင်သိတာလေ။ ကိုယ်ပြောမှဖြစ်မယ့် ကိစ္စရပ်ကို အလျင်စလိုပြောဆိုခြင်းမပြုဘဲ မိမိဘာသာ အထက်ကမေးခွန်းကို အရင်ဆုံး စဉ်းစားတွေးခေါ်ပါ။ ဒီမေးခွန်းရဲ့ ရလဒ်အဖြေ မကောင်းရင်ဖြင့် သူ့ကိုပြောပြမယ့်အစီအစဉ်ကို ပြန်စဉ်းစားရမှာဖြစ်ပါတယ်။ သူ့ကိုချစ်တာ တစ်ခုတည်းအတွက် ကိုယ့်အနာဂါတ် နဲ့ ကလေးအနာဂါတ်ကို Risk ယူလိုက်တော့မလား ပြန်စဉ်းစားရမှာဖြစ်ပါတယ်။
ကိုယ်ကသူ့ပြောပြလိုက်လို့ သူသွေးသား ၊ ခုလက်ထပ်ယူမယ်လို့ ဆိုလာရင် အထက်ကမေးခွန်း အဆင်သင့်မဖြစ်သေးဘဲ အိမ်ထောင်တစ်ခုကို ကောက်ကာငင်ကာ တည်ထောင်ရတော့မယ်။ တချိန် အိမ်ထောင်အဆင်မပြေတဲ့အခါမှ “ဒီကိုယ်ဝန် လက်ထပ်ယူခဲ့တာပဲ ကံကောင်း” ဆိုပြီး သူတင်တင်စီးစီးပြောတာ ခံနေရဦးမယ်။ သူမှ ကယ်တင်ပြီးမယူရင် ဗိုက်တစ်လုံးနဲ့ ဘဝပျက်ကျန်ခဲ့တော့မယ့်အတိုင်းပေါ့။ အဲဒီအချိန်မှာမှ ကိုယ့်မှာရွေးချယ်မှုရှိခဲ့ရက်နဲ့ မရွေးချယ်ခဲ့တာကို နောင်တရတော့မယ်။
ကျွန်မကကလေးဖျက်ချတာကို အားပေးတဲ့သူတစ်ဦးမဟုတ်ပါဘူး။ ဒါကြောင့်လည်း ကိုယ်ဝန်ရလာနိုင်ချေကနေ တားဆီးရှောင်ရှားနိုင်တဲ့နည်းတွေကို အရင်ဆုံး ရေးသားထားခဲ့တာပါ။ ဒါပေမယ့် ကိုယ်ဝန်ရလာပြီးမှတော့ ယူလိုက်ရုံပေါ့ဆိုတဲ့ ပေါ့ပေါ့လေး မထူးဇတ်ခင်းမှာကိုလည်း အားမပေးပါဘူး။ လူကြီးနှစ်ဦးရဲ့ ဆုံးဖြတ်ချက်ဟာ ကလေးရဲ့ အနာဂါတ် ၊ ပျော်ရွှင်မှုတွေကို ထိခိုက်နိုင်တဲ့အပြင် အပြစ်မဲ့တဲ့ကလေး စိတ်ဒဏ်ရာတွေနဲ့ မကြီးပြင်းစေချင်လို့ပါ။
ဒီကိုယ်ဝန်ကို မွေးဖွားလိုက်ဖို့ဆိုတာဟာ လူတစ်ဦးရဲ့အနာဂါတ် ငါတို့ဘယ်လောက်အာမခံချက် ပေးနိုင်သလဲဆိုတဲ့ ဘဝမှာ အကြီးမားဆုံးတာဝန်ကို ဆုံးဖြတ်ပေးလိုက်တာပါပဲ။ မိဘနှစ်ဦးက ကလေးယူဖို့ ဆုံးဖြတ်တာ ၊ မိခင်က ဖျက်ချဖို့ဆုံးဖြတ်တာ ဒီနှစ်ခုစလုံးကို ဗိုက်ထဲက ရင်သွေးက ရွေးချယ်ခွင့်မရှိပါဘူး။ ကိုယ့်ဆုံးဖြတ်ချက်အတွက် လူဖြစ်လာမယ့်ကလေးကို တချိန် အိမ်ထောင်ရေးအဆင်မပြေတော့မှ အငြှိုးတွေနဲ့ စိတ်ဒဏ်ရာမပေးကြေးနော်။ သူ့မှာ ဘာအပြစ်မှမရှိဘူးရယ်။